வாழ்க்கைக் கணக்கு

வாழ்க்கைக் கணக்கு

படம்: சிவபாலன்

பாடல்: அமீர் 

வாழ்க்கைக் கணக்கு

-- அமீர்

ஒரு முற்றிய ரோஜா
மேனி கருத்து
கூனி நடந்து
அந்திவானின் ஒளியில்
லாபக்கணக்கு பார்க்கிறது

லாபமென்று எதைச் சொல்ல?
நட்டமென்று எதைச் சொல்ல?

பள்ளிக்குப் போகாமல்
பஞ்ச பிழைப்புக்கு ஓடிய
பிஞ்சு பருவத்தில்
உழைப்புக்கு
லாபமென்று தொடங்கிய
நட்ட  கணக்கு எண்ணிக்கை
செழித்து வளர்ந்தது

கட்டிக்கொண்ட கணவன்
வெட்டிக்கொண்டு போனதில்
கண்டபடி நட்டம்

கொட்டிவளர்த்த பிள்ளைகளும்
கைகழுவிக் கொண்டதில்
நட்டமோ நட்டம்

பிறந்தது முதல்
இடைவிடா பயணத்தில்
பருவமெல்லாம் நட்டம்

நிலவறை நோக்கிய
பயணத்தில்
நடக்காமல் போவது மட்டுமே
இவளுக்கு லாபம்....

"இப்படி
இயங்கியவளை யான் காணவே
என்ன தவம் செய்துவிட்டேன்" என்று
பழைய கவியின் பாடல்
நினைவுக்கு வந்ததால்...

அதிசயிக்கிறேன்
காதல் கொள்கிறேன்
உழைப்பைத் துணையாக்கிய
இந்த அறுபதைக் கடந்த
அழகியைப் பார்த்து !!!

--------------------------------