— ஆர். பாலகிருஷ்ணன்
கருத்தான தமிழணங்கு
கறுத்திருக்கிறாள்.
ஏனெனில் அவள்
பொறுப்பாக இருக்கிறாள்.
அதனால் பொங்கி எழுகிறாள்.
சினத்தின் நிறம்
சிவப்பு மட்டுமல்ல.
கறுப்பும் சிவப்பும்.
ஐயம் இருந்தால்
தொல்காப்பியரை
கேளுங்கள்...
"கறுப்பும் சிவப்பும் வெகுளிப் பொருள
நிறத்துரு உணர்த்தற்கும் உரிய என்ப"*
தாலாட்டி பாலூட்டும் போது
அவள் தாய்
தாக்கும் போது அணங்கு.
அதனால் தான்
" தாக்கணங்கு" என்றார்
வள்ளுவர்.
தமிழணங்கின்
கையில்
தனித்துவ படைக்கலம்.
ழகர வேல்!
எவரும் இதை மறவேல்.
-- ஆர். பாலகிருஷ்ணன்
* "கறுப்பும் சிவப்பும் வெகுளிப் பொருள
நிறத்துரு உணர்த்தற்கும் உரிய என்ப". ( தொல். 855)
No comments:
Post a Comment