— முனைவர் கி. காளைராசன்
புதுக்கோட்டை தஞ்சாவூர் சாலையில் பெருங்களூர் - ஆதனக்கோட்டை அருகே சாலை யோரம் முந்திரிக்கொட்டை யிலிருந்து பருப்பு எடுத்து விற்கின்றனர். சுமார் 45 செ.மீ. விட்டமுடைய அலுமினியச் சட்டியின் அடிப்பாகத்தில் சிறுசிறு துவாரங்கள் (ஓட்டைகள்) இட்டுள்ளனர். இந்தச் சட்டியில் முந்திரிக் கொட்டைகளைப் போட்டு அடுப்பில் வைத்து சூடாக வறுக்கின்றனர். தீயும் இந்தச் சட்டியில் உள்ள துவாரங்கள் வழியாக சட்டிக்கு உள்ளேயே வருகிறது. இதனால் சட்டியின் உள்ளேயும் நெருப்பு எரிகிறது. இவ்வாறு நெருப்பில் முந்திரிக் கொட்டை எரியும் போது அதன் மேலோடு எரிந்து அதிலிருந்து எண்ணெய் போன்ற திரவம் கசிந்து வருகிறது. இந்த எண்ணையுடன் சேர்ந்து நெருப்பு நன்றாகச் சுடர்விட்டு எரிகிறது.
சட்டியில் உள்ள துவாரங்கள் வழியாக இந்த எண்ணெய் அடுப்பிற்குள் விழுகிறது. இதன் காரணமாக அடுப்பும் எரிகிறது. முந்திரிக் கொட்டையின் மேல் உள்ள ஓடுதான் அடுப்பிற்கான எரிபொருள் ஆகப் பயன்படுகிறது. விறகு அல்லது வேறு எந்தவொரு எரிபொருளும் பயன்படுத்தப்படுவதில்லை. கையில் வைத்துள்ள நீண்ட இருப்புக் கம்பியின் முனையைச் சற்று வளைத்து வைத்துள்ளனர். இந்தக் கம்பிக் கொண்டு சட்டியில் உள்ள முந்திரிப் பருப்பு முழுமையாக எரிந்துவிடாமல் கிளறி விட்டுக் கொண்டே இருக்கின்றனர். உடைத்து எடுக்கக்கூடிய பக்குவத்திற்கு வந்தவுடன் சட்டியில் இருக்கும் வறுத்த கொட்டைகளைத் தனியாகக் கொட்டி வைக்கின்றனர். புதிய கொட்டைகளை எடுத்து வறுக்கத் துவங்கிவிடுகின்றனர்.
வறுத்தெடுக்கப்பட்ட முந்திரிக் கொட்டைகளை எடுத்து சிறிய கல்லில் வைத்து உடைத்து முந்திரிப் பருப்பைப் பிரித்து எடுக்கின்றனர். முந்திரிக் கொட்டையின்கூடு எரிபொருளாகப் பயன்படுகிறது.
பிரித்து எடுக்கப்பெற்ற முந்திரிப் பருப்பைக் காயவைக்கின்றனர். அந்த முந்திரிப் பருப்பின் மேல் மெல்லியதான ஒரு தோல்போன்ற பகுதி மூடியுள்ளது. அதை ஒரு கல்லில் வைத்துத் தேய்த்து உரித்து எடுக்கின்றனர். இவ்வாறு தோல் உரிக்கப்பட்டவுடன் வெள்ளை நிறத்தில் முந்திரிப்பருப்பு விற்பனைக்கு வருகிறது. விலை - கால் கிலோ ரூ.220/-
குடிசைத்தொழில். 15-20 குடும்பத்தினர் பரம்பரை பரம்பரையாகச் செய்து வருகின்றனர். குறைந்தவிலையில் சுத்தமாக சுவையாகக் கிடைக்கிறது. புதுக்கோட்டை - தஞ்சாவூர் சாலையில் பயணம் செய்வோர் அனைவரும் ஆதனக்கோட்டை (Adhanakkottai, Tamil Nadu 614902) அருகே சாலையோரம் தயாரிக்கப்படும் இந்த முந்திரிப்பருப்பை வாங்கிப் பயனடையலாம்.
தொடர்பு: முனைவர் கி. காளைராசன் (kalairajan26@gmail.com)
