தேடிக்கொண்டிருக்கிறேன்.

-- ருத்ரா இ.பரமசிவன்

அதைத்தான் இன்னமும் 

தேடிக்கொண்டிருக்கிறேன்.

கால்சட்டை போட்டுக்கொண்டு

கோலி விளையாடிய போது அவன்

மொழியை உடைத்து விடவேண்டுமே

என்ற வெறியைத்தேடினேன்.

தட்டாம்பூச்சி சிறகுகளை

காதோடு காதாக ஒட்டிவைத்துக்கொண்டு

கிர்ரென்று அது போடும் 

ஓசைக்குள்

அர்த்தம் புரியாத‌

நியாய வைசேஷிகத்தையும்

பூர்வ உத்தர மீமாம்சங்களையும்

தேடினேன் என்று

சுருக்கம் விழுந்த வயதுகளில் 

நினைவுகளை சவைத்துத் துப்பும்போது

தெரிந்து கொண்டேன்.

அவளிடம் என்ன இருந்தது என்று

தெரியாமலேயே

அவளிடம் இன்று வரை

தேடிக்கொண்டிருக்கிறேன்.

வேறு வேறு கூட்டில்

இருவருக்கும்

ஆறேழு குஞ்சுகள்

சிறகடித்துக்கிடந்த போதும்

இன்னமும் அதைத் தேடிகொண்டிருக்கிறேன்.

இப்படி தேடுவது என்பது

டி.என்.ஏ, ஆர்.என்.ஏக்களின்

அமுத ஊற்றுகளின் சங்கிலி.

கடவுள் என்பவனுக்கு

இந்த ஊற்றுகளை

சுவைக்க முடியாது.

இந்த பிரபஞ்சத்தை வெற்றிலை மடித்து

பாக்கு புகையிலையோடு

நுண்ணிய கணிதத்தில் சுருட்டி

வாயில் போட்டு

"ப்ரேன் காஸ்மாலஜி" என்று

மூளையோடு குதப்பிக்கொள்ள‌

அந்த கடவுளுக்குள்

ஒரு "எட்வர்டு விட்டன்"

இறங்கித் தூர் எடுக்கவேண்டுமே.

"குவாண்டம் நுரை"கோட்பாடு வரை

சூன்யத்துள் சூன்யத்தையே

பாதாளக்கரண்டி போட்டு..

ஹிக்ஸ் போஸான் தான்

அந்த ரகசியம் என்று

ஆற்றல் பிழம்பை உடைத்து

அந்த கொட்டையை எடுக்க‌

செர்ன் எனும் அணுவுலைக்குள்

நோண்டி நொங்கு எடுக்க..

தேடிக்கொண்டிருப்பதில்

அவனையும் 

எப்படி கட்டி இழுத்துக்கொண்டிருப்பது?

கும்பாபிஷேக நெய்ப்பிசுக்கில்

அவன் நாக்கினால் சப்பிக்கொண்டிருக்கட்டும்.

நான் தேடுவதில்

பிரபஞ்ச நரம்புக்கூட்டங்கள்

தாறு மாறாய் கலைந்து கிடக்கின்றன.

பேசாமல் அந்த தர்ப்பணங்களை

அவன் தின்று கொண்டிருக்கட்டும்.

துருப்பிடித்த ஸ்லோகங்களை

டிங்கரிங்க்கு அனுப்பி அல்லவா

நிமிர்த்திப்பார்க்க வேண்டும்.

கடவுளை கடவுளே

ஒரு நாள் கூட நிமிர்த்திவைத்து

பார்த்ததில்லை.

நானும் அதைத்தான் தேடுகிறேன்.

அவனுக்குப்பதில்

அவனுக்காக நான்

தேடிக்கொண்டிருக்கிறேன்...

அவன் என்னைத்தான் தேடுகிறான் என்று

தெரியாமல்

இன்னமும் நான்

தேடிக்கொண்டிருக்கிறேன்.

___________________________________________________________

 

கவிஞர் ருத்ரா இ.பரமசிவன்
ruthraasivan@gmail.com

___________________________________________________________

 

 

பெண்ணே!

-- ருத்ரா இ.பரமசிவன்

http://ignite.globalfundforwomen.org/

பெண்ணின் எழுச்சியை
பூவுக்குள் பூகம்பம் என்றார்கள்.
அவள் சிரிப்பைக்கூட‌
காதல் மை தொட்டு
அப்படித்தான்
கவிதையும் எழுதப்படுகிறது.
அவள் துடைப்பம் எடுத்தாலும்
அது
சமணர்களின் மயில்பீலித் துடைப்பம்.
பெண்ணின் மடியில்
இன்று கணிப்பொறி குழந்தையும்
மழலை பொழிகிறது.
பெண் அழகு மட்டும் அல்ல!
அவள் அறிவின் அடர்த்தி
அசர வைத்தது
இந்த உலகத்தையே!
அவளுக்குள் அவன்!
அவனுக்குள் அவள்!
இதற்கு என்ன "இலக்கணக்குறிப்பு"எழுதுவது?
காதல் குமிழிகள் கட்டிய வீட்டில்
அன்னத்தூவிகள் எல்லாம்
உதிர்ந்து போனபின்
கரடு முரடாய் சோறு பொங்கி
தொட்டில் கட்டி
பாசமலர்க்காட்டில்
அவள் தொலைந்து போன போது
அப்போதும் யோசிக்கிறாள்
அது என்ன இலக்கணம் என்று.
எந்திரமாகித்தான் போனாள்.
பரிணாம வீச்சில்
கங்காரு நிலையிலிருந்து
குதித்து வந்தவள் போலும் அவள்!
குழந்தை குட்டிகளை
அவள் மட்டுமே ஒரு
பாசப்பைக்குள் வைத்துக்கொண்டு
ஓடுகிறாள்.
அவள் வேகத்துக்கு ஈடு கொடுக்க முடியாத‌
வாழ்க்கைச்சக்கரம் கூட‌
மூச்சு வாங்கி நின்று கொள்கிறது!
புதிய புதிய யுகங்களுக்குள்ளிருந்து
இன்னும் இன்னும்
புதிய புதிய யுகங்களாய்
தோலுரித்துக்கொள்கிறாள் அவள்.
மிச்சம் கிடக்கின்ற அந்த‌
பாம்புச்சட்டைகளை
மியூசியத்தில் வைத்து
பாது காத்துக்கொள்ளுங்கள்.
மஞ்சள் குங்குமம் வைத்து
பூஜித்துக்கொள்ளுங்கள்
அவள்
புள்ளி வைத்து கோலம்போட்டு
தெரு முனையில்
தேங்கிப்போக அவதாரம் எடுக்கவில்லை!
அவள் புள்ளிகளும் கோடுகளும்
ஆயிரம் ஆயிரம் கணினிகளுக்குள்
"அல்காரிதம்" ஆனதில்
பிரபஞ்சங்கள் கூட‌
அவள் பூங்கரத்தின் செம்பஞ்சுக்குழம்பில்
மெகந்தி ஆயின!
படைக்கும் பிரமனின் "ப்ராஜெக்டில்"
உள்ள குளறுபடிகளைக்கூட‌
"டீ பக்" செய்து
ப்ரோகிராம் ஓட்டி வாகை சூடுவாள்.
பெண்ணே!
இனி என்றும் உனக்கே வெற்றி!

___________________________________________________________

 

கவிஞர் ருத்ரா இ.பரமசிவன்
ruthraasivan@gmail.com

___________________________________________________________

 

முதல் இந்தி எதிர்ப்பு போராட்டத்தினை தொடங்கி வைத்தது யார்…?

--  சன்னா.

 

ஈவெரா அவர்களை பெரியார் என அழைக்கக் காரணம் யார்..?

அகில இந்தியாவிற்குமான முதல் தலித் பெண் தலைவர் யார்..?

முதல் இந்தி எதிர்ப்பு • சென்னை மாகாண பிரதம அமைச்சர் ராஜாஜி 1937 ஆகஸ்ட் 10ம் நாளன்று இந்தி மொழி கட்டாயமாக்கப்படும் என்று அறிவித்தார். அது மக்களிடையே கொந்தளிப்பை உருவாக்கியிருந்தது. ஆனால் அது ஒருங்கிணைக்கப்படவில்லை இதை பயன்படுத்திக் கொண்ட ராஜாஜி 21.04.1938 அன்று ஓர் ஆணையை பிறப்பித்து பள்ளிகளில் கட்டாய இந்தி மொழியைக் கட்டாயமாக்கினார். எல்லோரும் கொதித்தார்கள். ஆனால் யார் தொடங்குவது என்பதில் ஏனோ தயக்கம் இருந்தது. இந்த தயக்கத்தை முதலில் உடைத்தவர் அன்னை மீனம்பாள் அவர்கள். (காண்க பேட்டி). அதன் தொடர்ச்சியாய் சென்னை தி.நகரில்

நடத்தப்பட்ட முதல் இந்தி திணிப்பு எதிர்ப்புக் கூட்டம் தந்தை சிவராஜ் தலைமையில் நடந்தது. அந்த வரலாற்றுக் சிறப்புமிக்க கூட்டத்தையும் போராட்டதையும் தனது வீர உரையால் தொடங்கி வைத்தவர் அன்னை மீனாம்பாள் அவர்கள். (கொடுக்கப்பட்ட படத்தில் தி நகரில் நடைபெறும் முதல் இந்தி எதிர்ப்பு கூட்ட மேடையில் நாற்காலியில் அமர்ந்திருப்பவர் தந்தை சிவராஜ். கீழே அமர்ந்திருப்பவர் அன்னை மீனாம்பாள், மைக் முன் பேசுபவர் சி.என்.அண்ணாதுரை அவர்கள்)

கூட்டம் முடிந்த பிறகு போராட்டம் தீவிரமானது. எல்லா தலைவர்களும் அன்னை மீனாம்பாள் இல்லத்திற்கு அவரையும் தந்தை சிவராஜ் அவர்களையும் பார்க்க வந்தவண்ணம் இருந்தனர். அதில் ஒருவராக கிஆபெ விசுவநாதத்துடன் வந்த ஜெகதீசன் உண்ணாவிரதம் இருக்க வேண்டும் என்று அன்னை மீனாம்பாள் அவர்களிடம் கேட்டார், உடனே தன் வீட்டிலேயே உண்ணாவிரதம் இருக்கலாம் என்று அம்மையார் அவருக்கு இடம் கொடுத்தார். விளைவாய் 01.05.1938 முதல் ஜெகதீசன் சாகும்வரை உண்ணாவிரத்தை தொடங்கினார். போராட்டம் சூடு பிடித்தது. (பார்க்க அன்னை மீனாம்பாளின் பேட்டி)

எனவே.. 1938 ஏப்ரல் கடைசி வாரத்தில் தொடங்கி 1940ல் முடிந்த இந்தி

எதிர்ப்பு போராட்டத்தை தொடங்கி அதை வளர்த்தெடுத்தவர் அன்னை மீனாம்பாள். அதனால்தான் சுதேச மித்திரன் இதழ் இந்தி எதிர்ப்பு போராட்டத்தின் தலைவர் என்று அன்னை மீனாம்பாள் அவர்களை பதிவு செய்தது (காண்க படங்கள்..)

இத்தனை ஆதாரங்கள் இருந்தும் அன்னை மீனாம்பாள் மற்றும் தந்தை சிவராஜ் ஆகியோருக்கு இந்தி எதிர்ப்பு போராட்டத்தை உயர்த்திப் பிடிக்கும் எந்த முற்போக்காளர்களும் உரிய அங்கீகாரம் வழங்க மறுக்கிறார்களே ஏன்…?

பெரியார் • காந்திக்கு மகாத்மா என்று பட்டம் இருப்பதுபோல ஈவெரா அவர்களுக்கு ஒரு பட்டத்தை நாம் ஏன் தரக்கூடாது என்று டாக்டர் 

தர்மாம்பாள், நாராயிணி அம்மாள் ஆகியோரை கேட்டேன், பிறகு பெரியார் என்று பட்டத்தை தேர்ந்தெடுத்து 13.11.1938 அன்று நடந்த பெண்கள் மாநாட்டினை அன்னை மீனாம்பாள் கொடியேற்றி தொடங்கி வைக்க, நீலாம்பாள் அம்மையார் தலைமையுரை ஆற்றினார். பிறகு ஈவெரா அவர்களுக்கு பெரியார் என பட்டம் அளிக்கப்பட்டது. ஈவெரா பெரியார் ஆனார். ஆனால் அன்னை மீனாம்பாள் என்ன ஆனார் வரலாற்றில்..?

பெண்ணியத் தலைவர் • திராவிட இயக்கதினருடன் சில வேளை நட்புடனும் சில வேளை முரண்பட்டும் இருந்த அன்னை மீனாம்பாள் எம்.சி.ராஜா, டாக்டர் அம்பேத்கர், தந்தை சிவராஜ் ஆகியோர் முக்கியத் தலைவர்களாக இருந்த டிப்ரஸ்டு கிளாஸ் இயக்கத்தின் முன்னணித் தலைவர்களில் ஒருவர் அன்னை மீனாம்பாள். பிறகு பட்டியலினக் கூட்டமைப்பு, இந்திய குடியரசு கட்சி ஆகியவற்றில் முக்கிய தலைவராக இருந்ததுடன், சென்னை மாகாணம் மற்றும் இந்திய அளவிலான மாதர் சங்க இயக்கத்தின் முன்னணித் தலைவர்.

பல்வேறு பதவிகளை வகித்த அன்னை மீனாம்பாள் கௌரவ நீதிபதியாகவும் இருந்திருக்கிறார். சென்னையில் எங்கு நீங்கள் மீனாம்பாள் பெயரில் உள்ள குடியிறுப்புகள், தெருக்களை பார்க்க நேர்ந்தால் அது அன்னை மீனாம்பாள் அவர்களின் நினைவாக வைக்கப்பட்டதே.. மக்களின் அன்பை அவ்வளவு பெற்றிருந்தார் அன்னை மீனாம்பாள்.

இந்தப் பெண்கள் தின நாளில் அன்னை மீனாம்பாள் அவர்களின் போராட்ட சாதனைகளை முன்வைத்து அனைவருக்கும் பெண்கள் தின நல்வாழ்த்துக்கள் தெரிவித்துக் கொள்கிறேன்..

அன்னை மீனம்பாள் அவர்களின் புகழ்பெற்ற முழக்கம்

••பெண்களின் விடுதலையே ஆண்களின் விடுதலை••

மேலும், இந்த ஆண்டாவது அன்னை மீனாம்பாள் அவர்களின் பெயரில் விருது ஒன்று அறிவிக்கப்படும் என எதிர்பார்க்கிறேன். ஆயினும், பலசிறப்புகள் வாய்ந்த இந்த பெரும் ஆளுமையை மறைத்தது யார்…? மறந்தது யார்…?

 

 

 

 

 

 

___________________________________________________________

 

 

கவுதம் சன்னா
 g.sannah@gmail.com

___________________________________________________________

 

 

கவுதம் சன்னாவுடன் ஓர் நேர்காணல் - 11

- செல்வன்.

பேரா யூகோ: ஆனால் அவர்கள் கட்சியில் சேர்ந்ததாலும், நீங்கள் பா.ம.க, மூவேந்தர் முன்னேற்றக் கழகம், கொங்குநாடு முன்னேற்றக்கழகம் மாதிரியான கட்சிகளுடன் கூட்டணி சேர்ந்ததாலும் ஜாதி வன்முறை குறைந்துள்ளதா? (மூவேந்தர் முன்னேற்றக் கழகம் தென் தமிழகத்தை சேர்ந்த தேவர் கட்சி, கொங்குநாடு முன்னேற்றக்கழகம் மேற்குப்பகுதி தமிழகத்தின் கவுண்டர் இனமக்களின் கட்சி)

சன்னா: நிச்சயமாகக் குறைந்துள்ளது. இதை இன்னொரு கண்ணோட்டத்தில் பார்ப்பதானால் நாங்கள் தலித் அல்லாதவருக்குக் கட்சியில் பதவிகளைக் கொடுப்பது பிற கட்சிகளுக்கும், சாதியினருக்கும் "நீங்களும் இக்கட்சியின் ஒரு அங்கம்" எனும் செய்தியை அளிக்கிறது. இதுவரை மற்ற சாதியினர்க்கும், கட்சிகளுக்கும் நெருக்கமாகும் வாய்ப்பு எங்களுக்கு மிகக் குறைந்த அளவிலேயே இருந்துவந்தது. பிற சாதிக்கட்சி தலைவர்களுடன் எங்களால் நேரடியாகப் பேச முடியவில்லை. அந்தத் தலைவர்களுக்கும் தலித் தலைவர்களுடன் பேசும் மனநிலையும் இல்லை. இத்தகைய மனத்தடை நீடித்து வந்தது. ஆக இம்மாதிரி சமயங்களில் கூட்டணி பற்றி பேசுவதற்கும், தொகுதிகளைப் பற்றி பேசுவதற்கும் எங்கள் கட்சியில் உள்ள தலித் அல்லாதோர் பெருமளவு உதவியாக இருக்கிறார்கள். இதன் இன்னொரு பலனும் என்னவெனில் எங்காவது ஜாதிக்கலவரம் நிகழ்ந்தால் எங்கள் கட்சியில் உள்ள தலித்-அல்லாத தலைவர்கள் களத்தில் உள்ள தலித் அல்லாதவருடன் எளிதில் பேச முடிகிறது. இது அமைதியை உருவாக்கவும், பிரச்சனைகளைத் தீர்க்கவும் உதவுகிறது. விடுதலைச் சிறுத்தைகள் கட்சியில் உள்ள தலித் அல்லாதோர் இதில் பெரும்பங்கு வகித்துள்ளார்கள். அவர்கள் பங்கை அங்கீகரிப்பதன் மூலமும், மதிப்பதன் மூலமும் இதுவும் ஒற்றுமை நிலவும் சமூகத்தை உருவாக்கும் முயற்சியே என்பதைப் புரிந்து கொள்ளலாம்.

பேரா யூகோ: சரி.நல்லது. ஆனால் அதே சமயத்தில் பரமக்குடியில் நிகழ்ந்தது என்ன என்பதைப் பார்த்தோமெனில் (பரமக்குடியில் செப்டம்பர் 2011ல் போலிஸ் துப்பாக்கிச்சூட்டிலும், லத்திசார்ஜிலும் ஆறு தலித்துகள் உயிரிழந்தார்கள்) அந்தக் கலவரத்தின் காரணமே தலித்துகள் குருபூஜை மற்றும் தெய்வமகான் என்ற சொற்றொடர்களை பயன்படுத்தக்கூடாது என்ற கோரிக்கையே ஆகும். அவர்கள் அந்தச் சொற்றொடர்கள் தம் தலைவரை குறிக்க மட்டுமே பயன்படுத்தப்பட வேண்டும் எனக் கருதினார்கள். இம்மானுவேல் சேகரனைக் குறிக்க இந்த வார்த்தைகள் எப்படி பயனாகலாம் எனக் கேட்டார்கள். இம்மாதிரி சூழலில் கட்சியில் உள்ள தலித் அல்லாத தலைவர்கள் குறுக்கிட்டு இதைச் சரிசெய்திருக்க முடியாதா?

சன்னா: நீங்கள் சொல்வது சரிதான். இது திடீரென எழுந்த பிரச்சனையோ, எதிர்பாராது எழுந்த பிரச்சனையோ அல்ல. அந்தப் பகுதியில் முக்குலத்தோர் குருபூஜை என்பதி முத்துராமலிங்கத் தேவரை மட்டுமே குறிக்க பயன்படும் சொல் என்பதில் மிகத் தீவிரமாக இருக்கிறார்கள். இம்மானுவேல் சேகரனின் குருபூஜை அவர்களது குருபூஜைக்கு போட்டியாக எழுந்ததும் பிரச்சனை துவங்கியது. பரமக்குடி துப்பாக்கிச் சூடு பிரச்சனை அன்றைய தினம் மட்டும் நிகழ்ந்த பிரச்சனையல்ல. இதன் விதை இம்மானுவேல் சேகரனின் குருபூஜை நிகழ்ந்த அன்றே விதைக்கபட்டுவிட்டது. அவர்கள் இதை ஒரு போட்டியாக நினைத்து நிறுத்த முனைகிறார்கள். இது ஒரு உணர்ச்சிகரமான விஷயமாகும். இம்மாதிரி விவகாரங்களை இரண்டு-மூன்று தலைவர்கள் உட்கார்ந்து பேசி சரிசெய்துவிட முடியாது. இது இம்மானுவேல் சேகரனுக்கும்,. முத்துராமலிங்கத் தேவருக்கும் 1950ல் நிகழ்ந்த மோதலின் தொடர்ச்சியாகும். அவர்கள் இருவரும் இன்று இல்லையென்றாலும், பிரச்சனை தொடர்கிறது. இதில் நாம் தலையிட்டு உடனடியான தீர்வைக் காணமுடியும் என எதிர்பார்க்க இயலாது. இதை நிறுத்தக்கூடிய வாய்ப்புள்ள தலைவர்கள் விடுதலைச்சிறுத்தைகள் கட்சியிலேயே இருக்கிறார்கள். இதனால் தான் 2011ல் நாங்கள் மதுரை மேயர் சீட்டை (பார்வர்ட் பிளாக் கட்சியின் நிறுவனர் மற்றும் தேவர் சமுதாய தலைவர்) மூக்கையா தேவரின் மகன் கணேசனுக்கு கொடுத்தோம். கட்சியில் அவர் பெயர் திருமா பசும்பொன் என்பதாகும். இதில் திருமா என்பது கட்சித்தலைவர் திருமாவளவனின் பெயரில் ஒரு பகுதி. மற்றும் பசும்பொன் என்பது முத்துராமலிங்கத் தேவரின் பிறந்த ஊர். அவர் இன்று கட்சியில் இல்லை. அது வேறு விஷயம். ஆனால் அவர் எங்கள் பக்கத்தில் அன்று இருந்ததால் பரமக்குடிக்கு வெளியே இருந்த முக்குலத்தோர் விடுதலைச் சிறுத்தைகளிடமிருந்து ஜாதிவன்முறை துவங்காது எனவும், விடுதலைச் சிறுத்தைகளால் அவர்களுக்குப் பிரச்சனை வராது எனவும் நம்பினார்கள். அவர் கட்சியை விட்டுப் போனபின்னும் பலரும் அதற்குள் மனம் மாறியிருந்தார்கள். எனக்குத் தெரிந்து ஒரு கிராமத்தில் பிள்ளை சமுதாயத்தை சேர்ந்த 500 பேர் ஒட்டுமொத்தமாக விடுதலைச் சிறுத்தைகள் கட்சியில் சேர்ந்தார்கள். இது விடுதலைச் சிறுத்தைகள் கட்சியின் உறுப்பினர்சேர்ப்பு முகாமில் நிகழ்ந்த சம்பவமாகும்.

கட்சித்தலைவர் தொல்.திருமாவளவனின் அறிவுரைப்படி நாங்கள் 2009லும், 2011லும் உறுப்பினர் சேர்க்கை முகாம்களைத் தமிழகத்திலும், புதுவையிலும் நடத்தி நடத்தி 45 லட்சம் உறுப்பினர்களை இரண்டு ஆண்டுகளில் சேர்த்தோம். இத்தகைய சிறப்புள்ள இந்த முகாமின் ஒருங்கிணைப்பாளராக நான் இருந்து வருகிறேன். இது தொடர்ந்து நல்லபடி நடந்து இயக்கத்தின் நோக்கத்தை வலுப்படுத்தி வருகிறது. இந்த முகாமில் பல முக்குலத்தோர்களும், நாயுடுக்களும், பிள்ளைமார்களும், கவுண்டர்களும் கட்சியில் சேர்ந்தார்கள். இது இந்த உறுப்பினர் சேர்ப்பு முகாம் மற்றும் தலித்துகள் அல்லாதவருக்குக் கட்சியில் தலைமைப்பொறுப்பு அளித்ததாலும் நிகழ்ந்ததாகும். ஆக வி.சி கட்சியில் உள்ள தலித் அல்லாதவர்கள் ஜாதி கலவரத்தையும், மோதலையும் கட்டுப்படுத்துவதில் பெரும்பங்கு வகிக்கிறார்கள்.

---..(திரு. சன்னா அவர்களின் நேர்காணல் தொடரும்...)..---

 

 

 

___________________________________________________________

 

 செல்வன்
 holyape@gmail.com

___________________________________________________________

 

சிறைக்கண் பீலி அதிர்தர ஆங்கண்

-- ருத்ரா இ.பரமசிவன்

சிறைக்கண் பீலி அதிர்தர ஆங்கண்

கோட்டுமா தொலைச்சிய கொடுவில் பகழி
கூர்த்தன்ன‌ நெடுவிழி கொலை செய்தாங்கு
வேறு வேறு கிடப்ப பேய்ச்சுரம் படுத்து
பொருள்வயின் ஆறலை நலிய விட்டனள்.
குவியிலை வீஇணர் நுண்ணறுந் தாது
சிதறுதரப் பொருதனள் சில்நகை சிந்தி.
பைங்கூழ்ச் சிறுகால் நடைசெய் சிறுவன்
சிறுபறை கண்ணகத்து ஓவுவின் மஞ்ஞை
சிறைக்கண் பீலி அதிர்தர ஆங்கண்
பரிவுதப பூங்கோல் எறிந்த நிலையின்
ஊழ் என்னே!பாழ் என்னே!அடுநனி காதலின்
அழல்பெய் மழையில் எனை மாய்ந்தே ஒழியும்
வண்ணம் செய்தனள் வாழியவள் நலனே.



விளக்க உரை:

கொம்பு முளைத்த காட்டுப்பன்றியைக் (கோட்டுமா) கொல்லும் (தொலைச்சிய) வளைந்த வில்லில் பூட்டிய அம்பு போல் கூரிய நெடும்விழி உடைய அவள் (தலைவி) தன் பார்வையால் என்னை (தலைவனை) கொலை செய்ததால் இப்போது நான் பொருள் வேட்டைக்கு வந்த நான் கை வேறாய் கால் வேறாய் ஆனவன் போல் இந்த அச்சம் தரும் காட்டுவழியில் தவித்து மாட்டிக்கொண்டேன்.(பேய்ச்சுரம் படுத்து)..அவள் அன்பில் பூத்த‌ இல்லறம் புகுவதற்கு நான் இந்த பொருள் தேடலில் காட்டுவழியில் அலைந்து திரியலுற்றேன்.(ஆறலை நலிய விட்டனள்).

கொத்து கொத்தான இலைகள் நடுவே அந்த சிறு பூங்கொத்துகள்  நுண்ணிய மகரந்தங்களை சிதற விட்டாற்போல் அவள் தன் மெல்லிய சிரிப்பை சிந்தி என்னோடு ஒரு போர்க்களம் புகுந்தாள்.(பொருதனள்) காதலால் தானே அவள் இப்படி என்னுடன் மோதுகிறாள்.இது ஒரு பொய்ச்சண்டை தானே! இருப்பினும் இது எனக்கும் வலிக்கும் ஆனால் வலிக்காது.ஒரு ஓவியத்தில் தெரியும் சண்டைக்காட்சியால் யாருக்கும் இங்கே ரத்தம் இல்லை.காயம் இல்லை.இருப்பினும் நானும் காயம்பட்டு தான் போனேன்.இந்தக்காட்சியை இதனோடு ஒப்பிட்டுப் பாருங்கள்.

அதோ அந்த பசுமையான குறுஞ்செடியின் இளந்தண்டை ஒக்கும் கால்களில் நடந்து வரும் சிறுவன் (பைங்கூழ்ச் சிறுகால் நடைசெய் சிறுவன்) தன் கையில் உள்ள சிறு பறையை அடித்துக்கொண்டே வருகிறான்.பறையின் அடிபடும் வட்டப்பொட்டு போன்ற கண்ணில் (கண்ணகத்து)ஒரு மயிலின் சிறு ஓவியம் தீட்டப்பட்டு உள்ளது.(ஓவுவின் மஞ்ஞை) அவன் கொஞ்சம் கூட பரிவு இன்றி (பரிவு தப) தன் கையில் உள்ள பூப்போன்ற சிறு கம்பினால் பறையின் மீதுள்ள அந்த ஓவியத்தில் அடித்துக்கொண்டிருக்கிறான்.(பூங்கோல் எறிந்த).அப்போது அந்த மயிற்சிறகுகளின் சிறு பீலி இருக்கும் அந்த வட்டக்கண் பெரும் அதிர்வு அடைகிறது.(சிறைக்கண் பீலி அதிர் தர ஆங்கண்).

அடிக்கும் போது வலிப்பது போல் தோன்றினாலும் அந்த பீலிகளின் அதிர்வு கூட கிச்சு கிச்சு மூட்டத்தான் செய்கிறது.இது என்ன  நிகழ்வு? இது என்ன வெறுமையான ஆனால் காதல் தாக்கும் உணர்வு? (ஊழ் என்னே! பாழ் என்னே!அடு நனி காதலின்).  இருப்பினும் இது அழல் வீசும் காதல் நோயின் மழை போன்றது. இதில் நான் இறந்து பட்ட ஒரு மாயத்தில் ஒழிந்து போகும் வண்ணம் அல்லவா அவள் ஒளிந்து விளையாடுகிறாள்.என் மீது அவள் காதலின் அழகு வாழ்க வாழ்க என்று வாழ்த்துகின்றேன்.(வாழி அவள் நலனே)

___________________________________________________________

 

கவிஞர் ருத்ரா இ.பரமசிவன்
ruthraasivan@gmail.com

___________________________________________________________