உள்ளொன்று வைத்து ...

--   துரை.ந.உ.

கவி.காளமேகம் :  சொற்சிலம்பம் ஆடுவதில் வித்தகர். ஒருகல்லின் இருமாங்காய் என்பதே பெரும் சாதனையாகக் கருதப்படும் காலத்தில், ஒரு கல்லால் இருமர மாங்காய்களைச் சாய்த்தவர் இவர்.  உள்ளொன்று வைத்து, வெளியொன்று சொல்லுவதில் இவரை வெல்ல ஆளில்லை என்றே உறுதியாகக் கூறிவிடலாம்.  சான்றாக, ஈசன் குடும்பத்தைப் பற்றிய இவரின் வாழ்த்துப் பாக்களைப் பார்ப்போம். மேலாக., கேலியும் கிண்டலுமாய் இருப்பதுபோலத் தோன்றும் பாக்களுக்குள், ஆழ்ந்து கவனித்தால் வாழ்த்தும் உட்பொருள் நிறைந்திருக்கும் .

சிவன் :

கவி.காளமேகத்தின்  வெண்பா :

கண்டீரோ பெண்காள் கடம்பவனத்து ஈசனார்

பெண்டீர் தமைச்சுமந்த பித்தனார் - எண்டிசைக்கும்

மிக்கான தங்கைக்கு மேலே நெருப்பை இட்டார்

அக்காளை ஏறினா ராம்

பொருள் விளக்கம் : 1

நேரடியாய் - பெண்பித்தன், தங்கைக்குத் தீவைத்து, அக்காவை ஏமாற்றினார் -

என்னும் கேலிப் பொருள் தரும் துரைவெண்பா(டல்) :

பெண்களே காண்பீர்! கடம்பவனத்து ஈசனவன்

பெண்களைத் தூக்கி அலைந்திடும் பித்தனவன்,

திக்கெட்டும், தங்கையின் மேல்நெருப்பை ஏற்றினார்,

அக்காவை ஏமாற்றி னார்!

பொருள் விளக்கம் : 2

மறைமுகமாய் - பெண்ணைத் தலையில் தாங்குபவர், பெண்ணுக்குச் சரிபாதி பங்களித்தவர், உலகுக்கு ஒளியேற்ற தீச்சட்டி ஏந்தி நந்தியில் வலம் வருபவர் -

என்னும் வாழ்த்துப் பொருள் தரும் துரைவெண்பா(டல்) :

கண்டாயோ பெண்ணே! கடம்பவனத்து ஈசனவன்,

கங்கைஉமை யாளைச் சுமந்தலையும் சித்தனவன்,

எண்திசையும் நன்குஒளிர கையில்தீச் சட்டியுடன்,

நந்தியின்மேல் ஏறினா ராம்!

--

தமிழ்ச் சொல், பிறமொழிச் சொற்களை வேறுபடுத்திக் காண்பது எவ்வாறு?

தமிழ்ச் சொல், பிறமொழிச் சொற்களை வேறுபடுத்திக் காண்பது எவ்வாறு?

--- துரை.ந.உ.

இலக்கணத்தைக் கூறிப்பயம்காட்டாமல், விதிகளைச் சொல்லிப் பயம்கூட்டாமல் சொல்ல முயன்றிருக்கிறேன், சில எளிய குறிப்புகளின் மூலம், எவை எல்லாம் தமிழில்லை என்று.

1) ர்,ழ்- எழுத்துகள், தமிழ் எழுத்திலக்கணத்தின்படி, குறிலை முதலெழுத்தாக உள்ள சொல்லில் இரண்டாம் எழுத்தாக வராது. அவ்வாறு வரும் சொற்கள் தமிழில்லை என்று கண்ணை மூடிக்கொண்டு சொல்லிவிடலாம் .

எ.கா:

தர்மன், கர்ணன், அர்ச்சுனன், நிர்மலா - தமிழில்லை

அர்த்தம், அர்ச்சனை, அர்ப்பணம்

கர்ப்பம், தர்க்கம், தர்மம், மர்மம், வர்க்கம்

சர்ப்பம், சர்வம், சொர்க்கம், சர்க்கரை

நிர்வாகம், நிர்மூலம், நிர்ணயம், நர்த்தனம் — தமிழில்லை.

2) மெய்யெழுத்தில் தொடங்கும் சொற்கள் தமிழில்லை

எ.கா :

ப்ரபஞ்சன், ப்ரியா, க்ரே, ப்ளூ - தமிழில்லை

3) வல்லின மெய்யெழுத்தில் (க்,ச்,ட்,த்,ப்,ற்) முடியும் சொற்கள் தமிழில்லை

எ.கா :

அசோக், பிரசாந்த், கான்க்ரீட், சோசப், - தமிழில்லை.

4) சொல்லின் நடுவில்வரும் வல்லின மெய்யெழுத்தில் -க்,ச்,ட்,த்- ஐத் தொடர்ந்து அதனதன் உயிர்மெய்யெழுத்துகள் மட்டுமே வரும் . வேறெழுத்துகள் வந்தால் தமிழில்லை .

எ.கா: க்-ஐத் தொடர்ந்து - க,கா,கி,கீ,கு,கூ ………… மட்டுமே வரும்.

விக்ரம், பத்மினி, வித்வான், அக்ரகாரம், உத்ரம் - தமிழில்லை

5) செள - இல் துவங்கும் சொல் தமிழில்லை

எ.கா :

செளக்கியம், செளந்தர்யம் - தமிழில்லை

6) யகரத்தில், யா- ஐத்தவிர , பிற எழுத்துகளில் தொடங்கும் சொல் தமிழில்லை

எ.கா :

யந்திரம் , யமன், யுவன், யுவதி - தமிழில்லை

7) ர, ல - இல் தொடங்கும் சொல் தமிழில்லை

எ.கா :

ராமன், ரங்கன், லட்சுமி, லட்சம், லட்சியம் - தமிழில்லை

கூடுதலாக, 

எல்லாருக்கும் தெரிந்த ஒன்றுதான் , இருந்தாலும் இதையும் பதிந்தால்தான் ஆரம்பத்தில் இருப்போருக்கும் பயன்தரும்

8) கிரந்த எழுத்துகள் - ஸ,ஷ,ஜ,ஹ,க்ஷ, ஸ்ரீ - மற்றும் இவற்றின் இனம் ) இருக்கும் சொற்கள் தமிழில்லை

எ.கா :

ஸ்ருதி, லஷ்மி, ஜெயமோகன், ஹிந்து, தக்ஷன், சுபஸ்ரீ = தமிழில்லை

குறுந்தொகையில் புதுக்கவிதை - பாட்டுக்குப் பாட்டு

-- துரை.ந.உ.

இருள் திணிந்து அன்ன ஈர்ம் தண் கொழு நிழல்
நிலவு குவித்து அன்ன வெண் மணல் ஒரு சிறை
கரும் கோட்டு புன்னை பூ பொழில் புலம்ப
இன்னும் வாரார் வரூஉம்
பன் மீன் வேட்டத்து என் ஐயர் திமிலே
-- குறுந்தொகை 123

நடுஇரவின் மைஇருளுள் நீளும் நிழலாய்
நெடுநிலவின் பால்ஒளியில் வெள்ளை மணலாய்
புன்னைமர மத்தியில் பூத்திருந்தேன் நான்உனக்கு
என்எண்ணம் ஏன்இன்னும் இல்லை உனக்கு
அண்ணன்மார் வந்ததுதான் தப்புக் கணக்கு​

---

பைம் கால் கொக்கின் புன் புறத்து அன்ன
குண்டு நீர் ஆம்பலும் கூம்பின இனியே
வந்தன்று வாழியோ மாலை
ஒரு தான் அன்றே கங்குலும் உடைத்தே
-- குறுந்தொகை 122

நீள்பசுங்கால் கொக்கின்பின் வெண்முதுகை ஒத்திருக்கும்
ஆழ்குளத்தின் ஆம்பலும் கூடக் குவிந்துவிட
நீள்இரவும் வந்துவிட நான்இனி என்செய்வேன் 
வீழும்இம் மாலைக்கென் வாழ்த்து

---

யாயும் ஞாயும் யார் ஆகியரோ
எந்தையும் நுந்தையும் எம் முறை கேளிர்
யானும் நீயும் எ வழி அறிதும்
செம் புல பெயல் நீர் போல
அன்பு உடை நெஞ்சம் தாம் கலந்தனவே   
-- குறுந்தொகை  40

என்தாயும் உன்தாயும் யாருக்கு யார்சொந்தம்
என்தந்தை உன்தந்தைக்கு எவ்வழி யில்பந்தம்
என்னைநீ உன்னைநான் எவ்வாறு தான்அறிந்தோம்
செம்மண்ணுள் பெய்தமழை நீர்போலச் செம்மையாய்
அன்பினுள் நம்முள்ளம் ஒன்றாய்க் கலந்தனவே

---

யானே ஈண்டையேனே என் நலனே
ஏனல் காவலர் கவண் ஒலி வெரீஇ
கான யானை கை விடு பசும் கழை
மீன் எறி தூண்டிலின் நிவக்கும்
கானக நாடனொடு ஆண்டு ஒழிந்தன்றே   
-- குறுந்தொகை 54

மதிமட்டும் இங்கிருக்க., மீந்திருக்கும் பெண்மையோ....
கதிர்காப்பான் கூட்டும் கவண்ஒலிக்கு அஞ்சி
மதயானைக் கைவிட்ட மூங்கிலைப் போல,
புதுமீனைக் கைப்பற்றும் தூண்டிலைப் போல,
பொதிகாட்டின் வேந்தனைத் தேடும் வெடுக்கெனவே !

---

பூ இடைப்படினும் யாண்டு கழிந்து அன்ன
நீர் உறை மகன்றில் புணர்ச்சி போல
பிரிவு அரிது ஆகிய தண்டா காமமொடு
உடன் உயிர் போகுக தில்ல கடன் அறிந்து
இருவேம் ஆகிய உலகத்து           
ஒருவேம் ஆகிய புன்மை நாம் உயற்கே 
-- குறுந்தொகை 57

மலர்நடுவே ஓர்நொடியே வந்தாலும் ஆண்டு
பலபோல் உருகும்நீர் வாழ் *மகன்றில் போல ..
அரிதாய்ப் பிரிவைக் கருதும் எமக்குள்
பிரிவுவந்தால் சேர்ந்தெம் உயிர்போகும் ....இப்பிறப்பில்
ஈருயிருர் ஓருயிராய் ஆனபிறகு இவ்வுலகில்
ஓருடலாய் வாழவைக்கும் துன்பத்தை வெல்வதற்கே.

மகன்றில் = இணைபிரியாமல் வாழும் நீர்வாழ் பறவை இனம்

---

இடிக்கும் கேளிர் நும் குறை ஆக
நிறுக்கல் ஆற்றினோ நன்று-மன் தில்ல
ஞாயிறு காயும் வெவ் அறை மருங்கில்
கை இல் ஊமன் கண்ணின் காக்கும்
வெண்ணெய் உணங்கல் போல           
பரந்தன்று இ நோய் நோன்று கொளற்கு அரிதே 
-- குறுந்தொகை 58

இடித்துரைக்கும் நட்பே! உமக்கு முடிந்தால்.,
வெடிக்கும்எம் காமத்தை எம்விருப்பம் போல்நிறுத்து.
ஞாயிறு சுட்டெரிக்கும் வெம்பாறை உச்சியில்
வாயில்லான் கையில்லான் காவல்கீழ் உள்ள 
உருகிய வெண்ணையைப் போல்-பரவும் காமம்
பொறுத்துப்பின் நீக்குவது என்பது அரிதே !

---

கடும் புனல் தொடுத்த நடுங்கு அஞர் அள்ளல்
கவிர் இதழ் அன்ன தூவி செ வாய்
இரை தேர் நாரைக்கு எவ்வம் ஆக
தூஉம் துவலை துயர் கூர் வாடையும்
வாரார் போல்வர் நம் காதலர்
-- குறுந்தொகை  103

ஆற்றின் சுழல்பல சூழ்ந்தகுளிர்ச் சூழ்நிலையில்
சேற்றில்செம் மீனுக்குக் காத்திருக்கும் வேளையதில்.....
முள்முருங்கைப் பூதோற்கும் மெல்லிறகும், கூரிய
வில்தோற்கும் செவ்வலகும் கொண்டுள்ள நாரைக்கு....
நேர்இன்னல் உண்டாக்கச் சாரலுடன் சேர்ந்தடிக்கும்,
கூர்வாடைப் போதினிலும்...வாராரோ நம்தலைவர் !
கூறவர்க்கு தோழி_நான்என் வாழ்வழிப்பேன் என்றே !!

---

கொங்குதேர் வாழ்க்கை யஞ்சிறைத் தும்பி
காமஞ் செப்பாது கண்டது மொழிமோ
பயிலியது கெழீஇய நட்பின் மயிலியற்
செறியெயிற் றரிவை கூந்தலின்
நறியவு முளவோநீ யறியும் பூவே.                       
-- குறுந்தொகை  2

மகரந்தம் தேன்நாடி நாளெல்லாம் தேடி ,
நுகர்ந்துண்டு , பூக்களுக்குள் வாழ்ந்து வரும்வண்டே..!
என்எண்ணம் சொல்லாமல் , கண்டதைச் சொல்வாயா ,,,
என்இணையாள் , கொள்ளும் உறவில் மயிலியல்பாள் ,
பின்வரிசைப் பல்போல் மிகநெருக்கம் கொண்டிருப்பாள் ,
பெண்ணவளின் கூந்தலைக் காட்டிலும் நன்மணம்
கொண்டது எதுவுமுண்டோ நீஅறிந்த பூவினிலே...!

---