அரியாசனத்தில் அமராத எழுத்துகள்

அரியாசனத்தில் அமராத எழுத்துகள்

*~*~*~*~*~*~*~*~*~*~*~*~*~*~*~*~*~*~*~*~*~*~*

நிறைவடைந்த புத்தகக் கண்காட்சியில்

எல்லாம் கலைந்த பின்னர் சுத்தம் செய்கின்றனர்

புனிதமடைந்திருந்த

களத்தில் எழுத்துகள் சிதறிக் கிடக்கின்றன

அறிவுத் தூர்வாரிக் கிடந்த

மைதானத்தில் நாளை படித்த மனிதர்களும் 

படிக்காதவர்களும் விளையாடும் போது புதுவாசனை நுகர்வார்கள்

சருகுகள் போல்

மண்ணில் ஒட்டியிருக்கும் வார்த்தைகள் உடையாமலிருக்க 

மிக முக்கியமாக 

கால்கள் மிதிபடாமல் பார்த்துக் கொள்ள வேண்டும்

அரியாசனத்தில் அமர்ந்த எழுத்துகள் தாண்டி 

கை முறிந்து கால் முறிந்து

பின்னப்பட்ட எழுத்துகள்

கலைமகள் கை உடைந்த வீணையாய் ஆங்காங்கே கிடக்கலாம்

தாண்டிப் போகும் போது

அதையும் ஒரு ஓரமாக அமர்த்தி விட்டுச் செல்லுங்கள்

அதற்கும் சிறிது மரியாதை தந்து

குப்பைத் தொட்டி குழந்தைக்கும் காப்பகமுண்டு

பிறந்தது அதன் பாவமல்லவே!!!

 --- பூங்கோதை கனகராஜன்

அழகு தமிழே வாழியவே!

நற்றமிழ் நானிலத்தே

சுற்றமும் பெருக்குமே

அற்றமும் அழிக்குமே

உற்றமும் நீயே அருந்தமிழே

பெற்றவளே நீயே

பெருங்குற்றமும் நீக்குமே

கற்றதனால் ஆயபயன்

உற்றதனால் தமிழும்

குன்றாது நிறையுமே

பைந்தமிழ் காக்கும்

பாரதத்திலே அன்னையே

தீஞ்சுவை நீயே 

திகழ்பரதக்கண்டத்திலே

உண்மை வார்த்தையில்

உள்ளொன்றும் புறமொன்றும்

வேறில்லை தூய்மையே

தாய்மையே தமிழே

தூய தமிழ் ஒன்றே

பிறமொழி கலப்புமில்லை

பெருந்தவமே பெருமையே

அருந்தவமே தமிழே 

நீ வாழியவே

போற்றுகிறேன் வணங்குகிறேன்

புலம்பெயரா புலமையே

நீ தருவாய் அன்னையே 

தமிழே தாயே

அருகு போல் நீ வளர்ந்து

அழகு தமிழே வாழியவே!        

தாய் மொழி நாள் வாழ்த்துகள்!

--- பூங்கோதை கனகராஜன்.